Ձմեռային արձակուրդներ կամ նոր արկածներ Հայաստանում
Աշխարհում չկա մարդ, ով չսիրի ճանապարհորդել։ Ոմանք սիրում են բացահայտել նոր քաղաքներ և երկրներ, նվաճել ամենաբարձր լեռները և իջնել վտանգավոր կիրճեր։ Մեզնից շատերը սիրում են նստել կրակի մոտ, վայելել ջերմությունը, շփվել մարդկանց հետ, մյուսները՝ նկարվել մշակութային և պատմական արժեք ունեցող վայրերում:
Բազմատեսակ ճաշակներ և նախասիրություններ, իսկ մեզ բոլորիս միավորողը մի բան է՝ ճանապարհորդության հանդեպ սերը, այդ թվում՝ ձմեռային սեզոնին։ Իսկ եթե սիրում ես ճանապարհորդել և համեմել արձակուրդները էքստրեմալ և ձմռանը բնորոշ սպորտաձևերի հետ, ապա կարող եմ քեզ առաջարկել Հայաստանում նման ճանապարհորդության մի քանի տարբերակ։
Հայաստանում ձմեռը սկսվում է նոյեմբերի վերջ, դեկտեմբերի սկիզբ։ Այն երկար չի տևում, և եղանակը հիմնականում մեղմ է, ոչ սաստիկ, երբեմն՝ ձնառատ։ Երևանում դեկտեմբերի միջին օրական ջերմաստիճանը տատանվում է +5-ից -5 C: Առաջարկում եմ ճանապարհորդությունը սկսել մայրաքաղաք Երևանից, այստեղ առաջարկները բազմազան են, հավատացնում եմ կգտնես քեզ կամ քո ընտանիքին հարազատ զբաղմունք։
Christmas bazar
Վերջին տարիներին մեծ թափ են առել տարատեսակ սուրբծննդյան տոնավաճառները։ Ամենամեծ տոնավաճառներից մեկը Կարեն Դեմիրճյանի անվան մարզահամերգային համալիրում է տեղի ունենում,մինչև Ամանոր։ Հավաքվում են գրեթե բոլոր ոլորտներից ներկայացուցիչներ, լավագույն տարբերակն է մի հարկի տակ հանդիպել տասնյակ հայկական նախաձեռնությունների։ Ընտրությունը մեծ է, սկզբի համար մի հատ լավ շրջիր, հետո նոր անցիր գնումների։ Մյուս տոնավաճառը մայրաքաղաքի հենց սրտում է, Հանրապետության Հրապարակում, խորհուրդ եմ տալիս այստեղ այցելել երեկոյան ժամին, տաք ես հագնվում, take away տաք ըմպելիք ես վերցնում ու զբոսանքը սկսում Աբովյան փողոցից, լույսերը միանալուն պես կհայտնվես հեքիաթային աշխարհում, այո, այս տարի շատ ուրիշ ամանորյա Երևան է։ Վայելիր հարուստ զարդարանքը, շքեղ տոնածառը, մոտեցիր փայտե տնակներին, այստեղ նույնպես կարող ես գնել հայկական արտադրության ապրանքներ, համտեսել հայկական գինուց պատրաստված գլինտվեյն` երաժշտության ռիթմերի տակ։ Զբոսանքը շարունակիր դեպի հրապարակի սահադաշտ և ատրակցիոն,որոնք գործում են ամեն օր` ժամը 13:00-22:00-ը։ Հիմա քայլիր Ամիրյան փողոցով դեպի Մաշտոցի պողոտա, չքնաղ տեսարան է քեզ սպասվում։
Իսկ եթե հենց ամանորյա գիշերն ես որոշել կախարդական դարձնել, ապա առաջին անգամ Հայաստանում կանցկացվի Օպերա-Բալ։ Բացառիկ տոնական միջոցառում՝ յուրահատուկ և չկրկնվող ձևաչափով: Դիմավորիր տարեմուտի գիշերը Հայաստանի Օպերայի և բալետի ազգային թատրոնում: Տոնական համերգային ծրագիր Թատրոնի և հրավիրյալ արտիստների մասնակցությամբ, հանդիսատեսի մասնակցությամբ վալսեր և հյուրասիրություն։
Անմոռանալի փորձ ամբողջ կյանքի համար
Մի ուրիշ օր այցելիր Երևան պարկ,տարածաշրջանի ամենամեծ թեմատիկ այգին, չմուշկներով սահիր. եթե երեխաների հետ ես, ապա սա լավագույն ընտրությունն է։ Անմոռանալի փորձ ամբողջ կյանքի համար: Մեծ ուրախություն և՛ երեխաների, և՛ մեծահասակների համար։ Չմուշկներով կարող ես սահել Օպերայում գտնվող Կարապի լճում, ի դեպ տարիներ առաջ, երբ Քիմ Քարդաշյանն առաջին անգամ էր Հայաստանում։ Ամուսինը, հանրահռչակ ռեփեր Քանյե Ուեսթը չպլանավորած համերգ ունեցավ այստեղ, վերջում էլ նետվեց ջուրը հարյուրավոր երկրպագուներ էլ կրկնեցին նրա այդ քայլը։
Ամանորյա օրերին երևանյան մի շարք թանգարաններ աշխատելու են հենց քեզ համար, միայն պետք է ընտրել և այցելել: Այցելիր ակումբներ, լսիր տաղանդավոր երաժիշտների։ Եվ իհարկե չես մոռանում համեղ սնվելու մասին Ղափամա, Խաշ, տարատեսակ ազգային ապուրներ, քաղցրավենիքից փորձիր գաթա, փախլավա, հալվա։
Ծաղկաձոր
Ծաղկաձորը Երևանից 50 կմ հեռավորության վրա է գտնվում, այն ամենահայտնի ձմեռային հանգստավայրերից է և լեռնադահուկային սպորտի սիրահարների համար յուրահատուկ տեղ է զբաղեցնում: Ճոպանուղի, ձյունածածկ բնություն, էլ ի՞նչ է պետք էքստրեմալ հանգիստ նախընտրողներին: Քաղաքի անբաժանելի մասն է կազմում ճոպանուղին, որն ունի 5 կայան: Կառուցվել են նաև շուրջ 30 կմ երկարությամբ սահուղիներ: Այստեղ ձմռան ամիսներին իրենց հանգիստն են անցկացնում ինչպես տեղացիները, այնպես էլ արտերկրից ժամանած ձմեռային մարզաձևերի հազարավոր սիրահարներ: Քաղաքում գործում են բարձրորակ ծառայություն ապահովող ժամանակակից հյուրանոցներ և հանգստյան տներ, համեղ ուտեստներ, տաք թեյ, ամեն ինչ իդեալական հանգստի համար: Քաղաքում կարող ես վարձակալել սպորտային գույք։
Ջերմուկ
Ջերմուկի հանգստյան գոտին զբոսաշրջիկներին գրավում է իր մեղմ կլիմայով: Ամռանն այստեղ հով է, իսկ ձմռանն՝ առատ ձյուն է տեղում, ամպամած օրեր էլ գրեթե չկան: Ջերմուկ քաղաքն իր ողջ գեղեցկությամբ բացվում է զբոսաշրջիկի առաջ 2480մ բարձրությունից: Սա Ջերմուկի ճոպանուղու ամենաբարձր կետն է: Տարվա այս եղանակին Ջերմուկը աննկարագրելի գեղեցիկ է, այն անպայման տեսնել է պետք: Իսկ տեղի բնակիչների հյուրասիրությունն ու ջերմությունը թույլ չեն տա, որ դու սառնություն զգաս: Ջերմուկ այցելել ձմռանն ու չընդունել տեղի հայտնի տաք աղբյուրներում լոգանք և բնական ջրային մերսումներ, կարելի է համարել, որ դու մեծ կորուստ ես ունեցել: Իսկ եթե երեխաների հետ ես, ապա պատրաստիր ամենամեծ ձնեմարդուն, ձնագնդիկ խաղալու լավագույն վայրերից մեկում ես։
Աշոցք
Աշոցքը շատ վաղուց համարվում էր ձմեռային զբոսաշրջության վայր, սակայն տարիների ընթացքում այն մոռացության մատնվեց ու միայն վերջերս կրկին հին ավանդույթը փորձում են վերականգնել: Այս սեզոնին ջերմաստիճանը կարող է նվազել մինչև -30 աստիճան Ցելսիուս: Ձﬔռային տուրիզմի համար Շիրակի մարզն ունի եղանակային բարենպաստ պայմաններ: Այստեղ այնպիսի հարմարություններ են ստեղծված, որ աﬔնաանփորձ մարդն էլ կարող է դահուկներով զբոսնել, իրենց մոտ ծառայությունն այդպես էլ կոչվում է, դահուկային զբոսանք: Մի քանի դահուկուղիներ կան, ինչպես Աշոցքում, այնպես էլ Գյումրիի մոտակայքում: Սարերի լեռներից այն կողմ Գյումրին շատ հարուտ պատմամշակութային կոթողներ ունի, կարող ես այնտեղ այցելել, ծանոթանալ տեղի արվեստագետների և արհեստագործների աշխատանքներին:
Գյումրիից 11 կիլոմետր հեռավորության վրա գտնվում է Կրաշեն գյուղը, որտեղ դահուկային բազա կա՝ մոտ 70 զույգ պրոֆեսիոնալ եվրոպական դահուկներով։ Դեկտեմբերից մինչև ապրիլ` կախված տարվա եղանակային պայմաններից այստեղ կազմակերպում են դահուկային զբոսանքներ։ Դահուկային զբոսանքներից բացի, կազմակերպվում են ձնագնդիով բիաթլոններ, ինչպես նաև այլ ձմեռային ժամանց։ Կրաշենում է Տույ-Տույ օթևանը, որը, հյուրատուն լինելուց բացի, հարմար գյուղական վայր է վառարանի շուրջ գյուղական կարտոֆիլ ու պանրխաշ կամ պարզապես մեկ գավաթ տեղական խոտաբույսերով թեյ վայելելու համար։
Աշոցքում անելիքները շատ են
Աշոցքում անելիքները շատ են, խորհուրդ կտամ մի քանի օր այստեղ անցկացնել, և օգտվել տեղանքի բարիքներինց։ Հովհաննես Ֆրանգուլյանը և Արման Ղուկասյանը կազմակերպուն են Ձյունառատ Պիկնիկ։ Ունեն տնակ Աշոցքի լեռներում ու այնտեղ կազմակերպում են խաշ, պիկնիկներ, ձմեռային ակտիվություններ։ Հրաշալի, գրեթե գաղտնի վայր ձյունածածկ լեռների և ձորերի մեջ, որտեղ կարող ես հանգստանալ՝ հեռու եռուզեռից: Ցանկության դեպքում նրանք քեզ համար կպատրաստեն բուրավետ գլինտվեյն։ Եվ հավաքվելով մեծ կրակի շուրջ՝ կխոսեք կյանքի մասին և կխաղաք սեղանի խաղեր։ Քայլարշավներ, սկի-տուռեր, Ֆռիռայդ՝ սառցե ջրամբարներ և ջրվեժներ այցելելու համար։
Կրկին Աշոցք
Կրկին Աշոցքում։ Եթե կյանքդ առանց էքստրիմի չես պատկերացնում, և ակտիվ հանգիստ ես ցանկանում, այս հարցում դիմիր North Adventures-ին, քեզ համար կկազմակերպեն Snowkite, էլ ի՞նչ է պետք , այստեղ ամեն ինչ կա․ առատ ձյուն, օդապարիկ, դահուկներ և սնոուբորդ։ Նրանք նաև կարող են կազմակերպել ճանաչողական տուր Աշոցքի վայրի բնության և ձմեռային հանգստի հիմնական միջավայրերի հետ, կզբոսնես 2000մ+ բարձրության վրա՝ Ախուրյան գետի և Աշոցքի վտակի հատման յուրահատուկ միջավայրում, կվայելես լեռնային թեյախմության արարողություն բաց երկնքի տակ, կծանոթանաս Աշոցքի դահուկային դպրոցի և նրա սաների միջազգային ձեռքբերումների հետ: Վերադարձին կանգ առ Գյումրիում, խորհուրդ եմ տալիս փորձել Քյալա, տեսքից մի քիչ վախենալու է, սակայն իր տեսակի մեջ դելիկատես է։
Լեռնանիստ
Դահուկավազքի սահուղի, ձյունագնաց, արտերկրից ժամանած հյուրեր, հայկական ավանդական խոհանոց, հյուրընկալ ընտանիք, պատմամշակութային հուշարձաններ, ազգագրական թանգարան։ Եթե դու սկսնակ ես, կամ երեխաների հետ ես, ապա կարող ես ընտրել այս վայրը։ Լեռնանիստ համայնքը հավակնում է դառնալ ձմեռային տուրիզմի կենտրոն: Մի քանի տարի առաջ այստեղ կառուցվել է դահուկավազքի սահուղի և ճոպանուղի (բուգել): Հարակից տարածքում էլ կարող ես վարձակալել համապատասխան սպորտային պարագաներ։
Ձյունագնացով կբարձրանաս լեռնալանջ, առջևումդ կբացվի ֆանտաստիկ տեսարան՝ ողջ Լեռնանիստը, ափիդ մեջ է։ Գեղեցկությունը կհաղթի ցրտին, երկար կանգնած կմնաս, որպեսզի վայելես գեղեցիկ ակնթարթը։
Սնոուշուինգ Դիլիջանում և ոչ միայն
Ձմեռային հանգստի մյուս տեսակը, որը առաջարկում է Հայաստանը, սնոուշուինգն է, սեփական ձմեռային կոշիկներիդ վրա ամրացնում ես այս հարմարություները և սկսում ես քայլել հեքիաթային վայրերով։ Ձյան կոշիկները հարմար են ցանկացած տարիքի և ցանկացած ֆիզիկական պատրաստվածության մարդկանց համար, այս տեսակի ձմեռային մարզաձևը նախնական մարզում չի պահանջում: Այն կարող ես իրականացնել գրեթե ողջ անտառածածկ տարածքներում, «Դիլիջան» ազգային պարկում, Ծաղկունյաց լեռներում և մի շարք այլ վայրերում, եթե Դիլիջանում ես դիմիր ինֆոկենտրոնին, նրանք քեզ կօգնեն սպորտային գույքի հարցում։
Քայլարշավ ձյունածածկ լեռնային արահետներով
Դե իհարկե Հայաստանը լեռնային հարուստ երկիր է, Գութանասար, Հատիս, Իլկասար, Քաջարանց, Խուստուփ ցանկացած 2000+ լեռներ։ Կարծես հայտնվել ես ձմեռային հեքիաթում։ Դու կվայելես կախարդական ձյունածածկ լեռնային արահետները, կայցելես խորհրդավոր հնագույն վանքեր և ամրոցներ, բարձր ձյունոտ լեռների տեսարանները, խորը կիրճեր։ Ձմեռային քայլարշավը իր տեսակի մեջ չկրկնվող ճոխություն է, սառած ջրվեժներ, ջնածածկ տարածքներ, հավատացնում եմ, եթե անգամ այս վայրերում ամռանն ես եղել, ձմռանը քեզ սպասվում է նոր զգացողությունների հրավառություն։ Այս նույն լեռներում, ու ոչ միայն այստեղ կարող ես նաև դահուկային ճանապարհորդություններ ունենալ։ Backcountry skiing: Այստեղ հստակ երթուղի չկա, դու ինքդ ես բացում այն։ Դահուկներով քայում ես ամենաբարձր կետը և սահում ներքև՝ վայելելով գեղեցիկ տեսարաններ։
Չենք մոռանում սնվելու մասին
Եթե Վայոց ձորի կամ Սյունիքի ճանապարհին ես անպայման կանգնում ես Արենիի կամ Աղավնաձորի շուկայի մոտ ու համտեսում Ղաուրմա։ Սյունիք հասնելուն պես, Սիսիան քաղաքում պատվիրում ես քյալագյոշ, եթե ծանոթ ես խաշին, սպասին՝ մածունից պատրաստվող ապուրին, ապա սա կդառնա քո ամենանախընտրելի հայկական ճաշատեսակը։
Լոռի
Գնում ենք Լոռի։ Լոռիում սպասվում է ձմեռային ռաֆթինգ ինչպես ջրի վրա, այնպես էլ ձյան վրա, մանրամասների համար կարող ես դիմել Rafting in Armenia-ին կազմակերպությանը, նրանք շատ արագ կկազմակերպեն։ Ձմեռային ճանապարհորդությունը կարող ես շարունակել նույն մարզի Տաշիրի համայնքի Մեծավան գյուղում և Վանաձորում , քանի որ այս տարի այնտեղ ձմեռային արկածային տուրիզմի կենտրոններ են բացվել` համապատասխան գույքով՝ դահուկավազքի դահուկներ, լեռնային հեծանիվներ, արկածային երթուղիներ:
Ձմեռային արկածներ ջրամբարների վրա
Ջրային արկածները շարունակվում են սափբորդի տեսքով, այս սպորտաձևով կարող են օգտվել միայն փորձառուները, արկածներ կարող ես ունենալ Ազատի ջրամբարում, Սևանա լճում և Ապարանի ջրամբարում, զգույշ կլինես, քանի որ ընկնելու դեպքում, ամբողջությամբ թրջվելու ես, իսկ եթե ձյուն է, մի անհագստացիր, բացի գույքից քեզ կտրամադրեն անձրևապաշտպան։
Իսկ Արտանիշում`տաքուկ հանգիստ լճի անզուգական ձմեռային տեսարաններով, բուխարի-վառարանով, համեղագույն սնունդ, շոգեբաղնիք (ֆիննական սաունա) հենց լճափին։
Ազատ թռիչք սարուձորի վրայով
Հայաստանի գեղեցկությունը ավելի ընդգծված և ամբողջական տեսնելու համար այս սեզոնին ևս իրականացվում են պարապլաներային թռիչքներ: Հայաստանի շունչը հնարավոր է զգալ նաև Ծաղկաձորից, Ազատի ջրամբարից և Եղվարդից թռիչքներ կատարելով: Զիպլայնով թռիչքներ նույնպես հնարավոր է իրականացնել Ենոքավանում, Ծաղկաձորում, Կապանում, Երևանում։
Ձնագնդիկի փառատոն Ապարանում
Լսե՞լ ես ձնագնդիկի փառատոնի մասին, ամեն տարի այն անց է կացվում Ապարանում, Երևանից 59 կմ հեռավորության վրա։ Այստեղ տարբեր երկրներից մասնակիցներ են գալիս, սկսվում է իրական զվարճանքը, ինչու ոչ, դու նույնպես կարող ես մասնակցել։ Մինչև Ապարան հասնելը կարող ես կանգ առնել Արագած գյուղում, նույնանուն հյուրանոցից ձնագնացով գնալ մինչև Արագած լեռան փեշը, եթե մեզ՝ հայերիս գիտես, ապա նաև գիտես, որ Արագած լեռը մեր հաղթանդամ հպարտությունն է։
Ինչպես հասկացար Հայաստանում ձմեռային արձակուրդը կարող է լինել բազմազան և տարատեսակ, բնավ պետք չէ ակտիվ հանգստի սիրահար լինել, որպեսզի վայելել Հայաստանի ջերմությունը։ Թակիր ցանկացած գյուղացու դուռ, ներս կհրավիրեն, վառարանի կողքին տեղ կտան, ու մի բաժակ թեյից հետո կտրատած կարտոֆիլ կդնեն վառվող մակերևույթի վրա, անունը Պլեճ է, հոտը զգացի՞ր,ամենահամեղ բանն է։ Չգիտեմ, այցելության համար որ մարզը կընտրես, բայց կարող ես համտեսել մի շարք տեղական ճաշատեսակներ։ Հարիսա, խաշ, որն ամբողջ Հայաստանում հնարավոր է գտնել, քրչիկ, ոսպով կամ լոբով ապուր, գաթա, փախլավա․․․Հա, մենք սիրում ենք հյուր ընդունել։
Նյութը պատրաստվել էր 34travel-ի համար
Leave a Reply