Բացահայտենք Տեսնելիք և անելիք

Արփի լիճ․ Բնության արտասովոր անկյուն

on
03.11.2019

Արփի լիճ հասնելու համար  մենք անցանք չորացած, անկենդան տարածքով։  Փոշոտ ճանապարհը, որով մենք սլանում էինք թվում էր անվերջ, միգուցե ավտոմեքենայի փչացած մագնիտաֆոնն էր պատճառը։  Գյումրիից մինչև ազգային պարկ երկու երգ հաջողվեց ունկնդրել, իսկ փոսի մեջ ընկնելիս էլ նույն երգը սկզբից էր միանում։ 

«Արփի լիճ» ազգային պարկը գտնվում էր  Շիրակի մարզում Հայաստանի հյուսիս-արևմտյան հատվածում՝ Հայաստանն ու Վրաստանը  կապող սահմանագծում։ Չնախատեսված էր այս ճանապարհորդությունը։  Ցերեկ էր, տպավորիչ ոչինչ չկար,  մտածում էի, թե ինչի՞ համար այսքան ճանապարհն անցա։ 

Տեղաբնակներն ասացին․ «Եթե ցանկանում ես լճի ողջ գեղեցկությունը տեսնել, ապա  պետք է սպասել երեկոյին»։ Այլևս ոչինչ չէր մնում անել, բացի սպասելուց։

Ժամանակը դանդաղ էր անցնում, հեռվում, լճի վրա թռչող սև կետ տեսա, ուշադրությունս  գրավեց։ -Սև արագի՞լ։ Տեղաբնակը ժպտաց և ավելացրեց- Արագիլի այս տեսակը շատ հազվադեպ է հանդիպում, դրա համար  լավ նայիր։

Արդեն հետաքրքիր էր։ Ինձ պատմեցին, որ  այստեղ կարող եմ տեսնել 670 տեսակների բարձրակարգ բույսեր, որոնցից 20-ը  ներառված են Հայաստանի Կարմիր գրքում։ Իսկ թռչնատեսակները 190-նն են, որոնցից 45-ն է ընդգրկված Հայաստանի Կամիր գրքում, ի դեպ լճի տարածքը  Birdlife Internatioanl միջազգային կազմակերպության կողմից ճանաչվել է որպես թռչունների կարևորագույն տարածք։ Ազգային պարկի տարածքում արբեմն հանդիպում  են նաև այծյամը և գորշ արջը։

Նոր հասկացա, թե ինչ նկատի ունեին «սպասիր» ասելով։ Անհնար էր անտարբեր անցնել այդպիսի գեղեցկության կողքով։ Երեկո էր։ Կյանքում առաջին անգամ ափսոսացի վայրկյաններ կորցնել լուսանկարելու վրա, տեսածս յուրաքանչյուր  ակնթարթ ցանկանում էի մտապահել մտքումս, և միակ պատճառը դա էր, չլուսանկարեցի մայրամուտը։

Հետո, երբ ինձ  խնդրեցին հիշել այդ օրվա ամենատպավորիչ, ազդեցիկ պահը, աչքիս առաջ հայտնվեց անհավանական տեսարանը․ ամպերը երկնքի փեշից կախված դանդաղ սահում էին, նրանց ոչինչ չէր անհանգստացնում, կարծես շտապելու տեղ էլ չունեին։

Հորիզոնում նշմարվեց  հրե գունդ։ Բնությունը կրկին կյանքի կոչվեց: Մեղմ քամի էր, թռչունների խոսակցությունը լսելի էր։ Հայաստանի արտասովոր այս անկյունը դյութել էր ինձ։ Հասկացա, որ մի քանի ժամը բավարար չէր բացահայտելու ազգային պարկի ողջ գեղեցկությունը։

Լուսանկարները  լեռնային ուղեկցորդ Արշակ Մկրտչյանինն է, ով աշխատանքի բերումով Արփի լճում անց է կացրել մի քանի շաբաթ։ 

Comments

ԹԵԳԵՐ
ՆՄԱՆ ԳՐԱՌՈւՄՆԵՐ

LEAVE A COMMENT

Lilit Khachaturyan
Armenia, Yerevan

Ողջույն, իմ անունը Լիլիթ է և սա իմ ճանապարհորդությունն է: Այս բլոգն իմ ճանապարհների մասին պատմելու լավագույն տարբերակներից է: Տեղ գտած յուրաքանչյուր պատմություն արտացոլում է իմ տեսածը, զգացածն ու փորձածը: Սիրում եմ երկար ճանապարհներ, գրքեր, գույներ, չեմ կարողանում անտարբեր անցնել քաղցրավենիքի կողքով, մինչ օրս վախենում եմ մորեխներից և գյուղական զուգարաններից: Բարի գալուստ իմ աշխարհ: